Цзянсу: самарали учрашувлар, фойдали мулоқотлар

Цзянсу – таркибида 13 шаҳарни бирлаштирган Хитойнинг йирик провинцияларидан бири. Провинцияда 80 миллиондан зиёд аҳоли яшайди. Провинция маркази – Нанкин шаҳри Мин сулоласи даврида Хитой пойтахти бўлган. 2014 йилда ушбу шаҳарда ўсмирлар ўртасида ёзги олимпиада ўйинлари ўтказилган ва шу муносабат билан кичик олимпиада шаҳарчаси бунёд этилган.

Делегация аъзоларини қабул қилган Цзянсу провинцияси телерадио корпорацияси таркибида 14 телеканал, 10 радиоканал мавжуд. Телекўрсатув ва радиоэшиттиришларни бир вақтнинг ўзида корпорацияси веб-сайтида томоша қилиш ва тинглаш мумкин. Ўзингизга маъқул келган телекўрсатувлар дастурини юклаб олишингиз учун 2 та махсус мобил илова ҳам яратилган.

«Цзянсу телерадио корпорациясида 8 минг ходим фаолият юритади. Мутахассислар тайёрлаш ва уларнинг малакасини оширишга алоҳида аҳамият берамиз. Техник ва ижодий ходимларимиз АҚШ ва Буюк Британиянинг етакчи телекомпанияларида малака ошириш курсларида мунтазам иштирок этади. Ўз навбатида, корпорациянинг ўзида ҳам хорижлик тажрибали мутахассислар билан тренинглар ўтказамиз. Бу ишлар учун ҳар йили 500 миллион юан маблағ сарфлаймиз», – дейди корпорация вице-президенти Цзян Сяопин.

Корпорация ўз киностудиясига ҳамда тўрт хил форматдаги кинотеатрлар тармоғига эга. Айни кунга қадар мазкур киностудия томонидан 400 га яқин телесериал ва фильмлар суратга олинган. Учрашув давомида киностудия мутасаддилари ўз фильм ва телесериалларини ўзбек томошабинларига ҳам тақдим этиш таклифини билдиришди.

Ўзбекистонлик журналистлар «Синьхуа кундалиги» таҳририяти ва музейи фаолияти билан ҳам яқиндан танишишди. «Синьхуа кундалиги» таҳририяти томонидан 14 номдаги газета, 8 номдаги журнал чоп этилади. Ахборотлар таҳририят таркибидаги 9 интернет сайт, 6 мобил илова орқали ҳам тарқатилади. Тонгги махсус газета 1 миллион, кечки газета эса 3 миллион нусхада чиқарилади.

«Бу менинг ўзбекистонлик журналистлар билан илк учрашувим. Самарқанд, Бухоро каби тарихий шаҳарларингиз ҳақида ОАВ ва китоблардан кўп маълумот олганман. Аспирантурада илмий иш қилган вақтимда Абу Али ибн Сино китобларини ўқиганман. Бугунги учрашувдан кейин тез орада Ўзбекистонга бориш ва сизлар билан тажриба алмашишни мақсад қилдим», – дейди Синьхуа ахборот агентлиги бош муҳаррири ўринбосари Ли Ян.

Учрашув давомида Синьхуа ахборот агентлиги халқаро алоқалар бўлими бошлиғи Шен Чженжун «Бир макон — бир йўл» лойиҳаси доирасида тажриба ва маълумот алмашиш учун ишлаб чиқилган янги акция тақдимотини ўтказди.

Агентлик бош муҳаррири ўринбосари Ли Ян акциянинг рамзий белгисини Ўзбекистон Журналистлари ижодий уюшмаси Фарғона вилоят бўлими раиси Муҳаммаджон Обидовга топширди.

«Хитой Ўзбекистоннинг асосий савдо-иқтисодий ҳамкорларидан бири бўлиб, икки мамлакат ўртасидаги ҳар томонлама манфаатли ҳамкорлик алоқалари ривожланиб бормоқда. Мамлакатлар ўртасидаги икки томонлама, шунингдек, ШҲТ, ‘Бир макон – бир йўл’ дастури доирасидаги ҳамкорлик кўлами кенгайиб, сифат жиҳатдан янги босқичга кўтарилмоқда. Бу икки мамлакат ОАВ ўртасидаги муносабатларда ҳам ўз аксини топмоқда. Тез орада Синьхуа ахборот агентлиги делегациясини Ўзбекистонда қабул қилиш ва тажриба алмашиш жараёнини мунтазам йўлга қўйишга тайёрмиз», – дейди Ўзбекистон Журналистлари ижодий уюшмаси Фарғона вилоят бўлими раиси Муҳаммаджон Обидов.

Бошқа хабарлар | 其他新闻

Хитой – ажобтовур ихтиролар ватани
Бор экан-да йўқ экан, оч экан-да тўқ экан, уч томони cувлар билан ўралган ярим оролда Чин мамлакати бор экан...Унинг кексалари ҳикматли, ёшлари ибратли, қозилари ...
Чин диёри сарҳадлари бўйлаб (очерк)
Тараддуд Хитой Халқ Республикасининг Ўзбекистондаги элчихонаси ташаббуси билан ўзбекистонлик бир гуруҳ журналистларнинг Хитойга қиладиган ижодий сафари май ойининг ўрталарига тўғри келди. 12 май куни, айтилган ...
Инсон капитали мамлакати — Хитой сафари таассуротлари…
Қадим Чин юртининг азим пойтахти бўлган, минг йиллик тарихга эга Пекин бизни ноодатий бўлган булутли осмони ила қарши олди. Кейин билсак, аслида бу булут ...
«Синьхуа» тажрибаси билан танишув
Хитойнинг ОАВ соҳасидаги тажрибасини ўрганиш, провинциялари ва шаҳарларининг «Бир макон, бир йўл» лойиҳаси доирасидаги иқтисодий имкониятлари билан яқиндан танишиш мақсадида бир гуруҳ ўзбекистонлик журналистлар ...
Медиа-тур: Асрлар бўйи сайқаланган ибодатхона
Осмон ибодатхонаси. XV-асрда қурилган ибодатхона шаҳардаги ягона думалоқ кўринишда бунёд этилган иншоат хисобланади. Чанвэн жанубий ҳудудида, шаҳар марказидан 4 км масофада жойлашган, Тиантан Гонг ...
Орзулар шаҳри сари
Медиа-тур давомида Пекиндан кейинги йўлимиз Фужоу бўлди. Эртакнамо шаҳар ўзини жозибадорлиги билан бизни ҳайратга солди. Айниқса Хитой ошхонасининг энг сара таомлари Пекинда каби бу ерда ҳам ...
Элни-элга боғлаган “Бир макон, бир йўл” …
Хитой  нафақат  саноати, техникаси ривожланган, қурилиш ва архитектурасининг ноёб ва бетакрорлиги билан донг таратган, балки илм-фан, санъат, маданият соҳасидаги улкан  ютуқлари билан ҳам  дунё ...
Тилимиз бошқа, дилимиз бир… 
(Навоийлик журналист Хитойда бўлиб қайтди) Хитой Халқ Республикаси — дунё  харитасидан аҳолиси  кўплиги, ишлаб чиқариши ривожланганлиги, янги инновацион ғоялар ижодкорлиги, техника тараққиётидаги улкан ютуқлари билан  мустаҳкам ...
«Ёпиқ шаҳар» сирлари
1406-1420 йилларда бунёд этилган Хитой императорлари қароргоҳи эгаллаган ҳудуди жиҳатидан ер юзидаги энг йирик сарой мажмуаси ҳисобланади. Энг қизиғи, орадан шунча аср вақт ўтса-да, ...
Хитой ва Ўзбекистон дўстлик алоқалари абадий
Катта таъсуротлар билан Пекинга самолёт билан учиб келдик. Медиа-турнинг сўнгги кунида Чет мамлакатлар билан Хитой Халқлари Дўстлик Жамияти фаолияти билан танишдик. 1954 йил 3-майда ...
Асрлар оша инсониятни ҳайратлантираётган девор
Дунёнинг етти мўъжизаси қаторига кирмаган бўлса-да, олимлар, тадқиқотчилар, қурувчилару фазогирлар, қолаверса сайёҳларнинг энг қизиққан объектларидан бири бу – Буюк Хитой деворидир. Кўпчилик Хитойга бориб, бу ...
Гуанси-Чжуан: ёрқин ранглар ила ой шуъласидаги рақс
Унутилмас саёҳат таассуротлари Хитойнинг жанубида жойлашган  Гуанси-Чжуан автоном районидаги бир нечта шаҳарларда бўлиб, “Пекин – Гуйлин” йўналиши бўйича янги сафаримиз бошланди. Гуйлин шаҳри ўзининг бетакрор табиати, ...